2021-01-18 419

УИХ-ын гишүүн Т.Доржханд хэд хэдэн асуудлаар мэдээлэл хийлээ.  Мэдээллийнхээ үеэр  Ерөнхийлөгчийн сонгуулийн тухай хуулиар иргэний хувиар Цэцэд хандаж байгаагаа мэдэгдлээ.

Тэрбээр “Хоёр долоо хоногийн өмнө Ерөнхийлөгчийн сонгуулийн тухай хууль батлагдсан. Гэвч Үндсэн хуультайгаа нийцэж чадаагүй. Олон эргэлзээтэй асуудлыг үүсгэж байна. Тухайлбал өмнөх Ерөнхийлөгч нар дахин сонгуульд нэр дэвших эсэх. Уг нь Үндсэн хуулинд нэр дэвших боломжгүй гэдгийг тодорхой заачихсан. Тиймээс  энэ асуудлаа Ерөнхийлөгчийн сонгуулийн тухай хуульд тодорхой зааж өгөх ёстой гэж үзэж Үндсэн хуулийн Цэцэд иргэний журмаар хандаж байна.

Учир нь Монгол Улсын Ерөнхийлөгч зөвхөн нэг удаа зургаан жилээр сонгогдоно гэдэг заалтыг Ерөнхийлөгчийн сонгуулийн тухай хуульд тусгаагүй. Энэ талаар УИХ дээр хоёр ч удаа асуухад хангалттай тайлбарлаж өгөөгүй. Хоёрдугаарт, хэрэв та бүхэн санаж байгаа бол Ерөнхийлөгчийн энэ зүйл заалтыг 2025 онд хэрэгжүүлнэ гэж байгаад нааш нь татсан. 2020 оны тавдугаар сарын 25-наас хэрэгжинэ гэж өөрчилсөн. Үүнийг тухайн үед Ерөнхийлөгчийг бүрэн төлөөлж байсан, Ерөнхийлөгчийн тамгын газрын дарга З.Энхболдтой харилцан зөвшилцөж, тохиролцож хийсэн.

Тэгэхээр энэ удаагийн Ерөнхийлөгчийн сонгуульд өмнө нь Ерөнхийлөгчөөр сонгогдсон, өнөө үе Ерөнхийлөгч хийж байгаа Х.Баттулга болон Ц.Элбэгдорж, Н.Энхбаяр Н.Багабанди, П.Очирбат нар дэвших эрх байхгүй. Учир нь өмнө Үндсэн хуулиар Ерөнхийлөгчийн хугацаа 2 удаа 4 жилээр буюу 8 жил байсан. Харин шинэ Үндсэн хуульд нэг удаа 6 жил гэж тодорхой тусгасан. Энэ тодорхой хугацаагаа Ерөнхийлөгчийн сонгуульд тусгах ёстой. Үндсэн хуулийн цэц хуулиа хүндэтгэн Үндсэн хуулиа барьж, асуудлаа шийднэ гэдэгт найдаж байна” гэлээ.

Холбоотой мэдээ